මධ්‍යම පළාත් ජනතාවගේ පානීය ජල සුරක්ෂිතතාවය තිරසාරව පවත්වා ගැනීම උදෙසා පළාත් පාලන ආයතන සඳහා සම්මත අතුරු ව්‍යවස්ථාවක් සකස් කිරීම වෙනුවෙන් සංවිධානය කරන ලද වැඩමුළුවක් අද දින (28) මධ්‍යම පළාත් ප්‍රධාන හා අධ්‍යාපන , පළාත් පාලන අමාත්‍යාංශයේ ලේකම් අජිත් ප්‍රේමසිංහ මහතාගේ ප්‍රධානත්වයෙන් පොල්ගොල්ල ජාතික සමුපකාර සංවර්ධන ආයතනයේ දී පැවැත්විණ.
මධ්‍යම පළාත් පළාත් පාලන දෙපාර්තමේන්තුව මගින් සංවිධානය කරන ලද මෙම දෙදින (28,29) පුහුණු වැඩමුළු වේ සම්පත් දායකත්වය බස්නාහිර පළාත් සභාවේ ප්‍රධාන නීති නිලධාරී, පාලිත අලහකෝන් මහතා විසින් ලබාදෙන ලදී.
මෙම වැඩසටහනේදී කෙටුම්පත් කිරීමට යෝජිත අතුරු ව්‍යවස්ථාව සඳහා අදහස් හා යෝජනා ලබා ගැනීම, පවතින නීතිමය පසුබිම විමසා බැලීම, විවිධ ආයතනයන් මේ සම්බන්ධව දරන මතයන් හා ඒ ඒ ආයතන මට්ටමින් පවතින නීතිමය රාමුව පිළිබඳව සාකච්ඡා කිරීම, අතුරු ව්‍යවස්ථාවට ඇතුලත් විය යුතු කරුණු ගොනුකිරීම, අතුරු ව්‍යවස්ථාව කෙටුම්පත් කිරීම හා කෙටුම්පත් කරන ලද අතුරු ව්‍යවස්ථාව සමාලෝචනයට ලක් කර අතුරු ව්‍යවස්ථාවේ අවසන් කෙටුම්පත සකස් කිරීම යන අංශයන් ඇතුලත් වේ.
සකස් කරනු ලබන අවසන් කෙටුම්පත සියලු පළාත් පාලන ආයතන වෙත ඉදිරිපත් කොට එකඟතාවය ලබා ගනිමින් ක්‍රියාත්මක කිරීමට සැලසුම් කර ඇති අතර,මෙම ව්‍යාපෘතිය සඳහා යුනිසෙෆ් ආයතනය මගින් මූල්‍යමය හා තාක්ෂණික අනුග්‍රහකත්වය ලබාදීම සිදු කෙරේ.
තිරසර සංවර්ධන ඉලක්ක සපුරාලමින් ජනහිතකාමී සේවා සැපයුමක් ඇති කිරීම වෙනුවෙන් සංවිධානය කරන ලද මෙම වැඩමුළුව සඳහා මහනුවර මහ නගර සභාවේ නගරාධිපති කේසර සේනානායක, නුවරඑළිය මහ නගර සභාවේ සභාපති චන්දන ලාල් කරුණාරත්න, දඹුල්ල මහ නගර සභාවේ නගරාධිපති ජාලිය ඕපාත යන මහත්වරුන් සහ නාඋල ,අඹගමුව , පූජාපිටිය, කොටගල යන ප්‍රාදේශීය සභාවල සභාපතිවරුන්, පළාත් පාලන කොමසාරිස් මේනක හේරත් මහතා , මුල් ළමාවිය සංවර්ධන ඒකකයේ අධ්‍යක්ෂ ටී. කේ. ගුණතිලක මහතා ඇතුළු පලාත් පාලන සහකාර කොමසාරිස්වරුන් හා ප්‍රාදේශීය සභා ලේකම්වරුන්, නීති නිලධාරීන්, යුනිසෙෆ් ආයතනයේ මධ්‍යම හා ඌව පළාත් භාර වැඩසටහන් නිලධාරි සුදත් අධිකාරම් මහතා, ජල සම්පත් මණ්ඩලය, මධ්‍යම පරිසර අධිකාරිය, ජල සැපයුම් දෙපාර්තමේන්තුව, වාරිමාර්ග,කෘෂිකර්ම, සෞඛ්‍ය, ගොවිජන සේවා, ඉඩම් පරිහරණ යන දෙපාර්තමේන්තු නියෝජනය කරමින් නිලධාරීන් පිරිසක් සහභාගී වූහ.
