මධ්‍යම පළාත් කාර්මාන්ත අමාත්‍යංශයේ මගින් සංවිධානය කරන ලද වනිතා කටුතු ,තරුණ කටයුතු හා කර්මාන්ත දෙපාර්තමේන්තුව සම්බන්ධ ව්‍යවසායකින්ගේ නිෂ්පාදන අලෙවි කරගැනීමේ පහසුකම් සැලැස්වීමේ අරමුණින් අමාත්‍යංශ ලේකම් උපාලි රණවක මහතාගේ උපදෙස් පරිදි සංවිධාන කෙරුණු අලෙවි පොළක් පසුගියදා කර්මාන්ත අමාත්‍යාංශය පරිශ්‍රයේදී පැවැත්විණ.මෙම අලෙවි පොළ සැම මාසයකම අවසාන් සතියේ පැවැත්වේ.

මහනුවර වැව රවුමේ ඇති ගස් පිළිබඳ කඩිනම් පරීක්ෂාවක් සිදු කොට ඒවායේ අනාරක්ෂිත බවක් ඇත්නම් ඒ සම්බන්ධයෙන් වහා පියවර ගන්නා ලෙස මධ්‍යම පළාත් ආණ්ඩුකාර නීතීඥ ලලිත් යූ. ගමගේ මහතා මහනුවර මහා නගර සභා බලධාරීන් වෙත දැනුම් දෙයි. මේ සඳහා පේරාදෙණිය උද්භිත උද්‍යානයේ හා වාරිමාර්ග දෙපාර්තමේන්තුවේ සහය ලබා ගැනීමේ වැදගත්කමද ආණ්ඩුකාර ගමගේ මහතා පෙන්වා දුන්නේය. පසුගියදා කොල්ලුපිටියේ බස් රථ නැවතුමක් අසලදී අනාරක්ෂිත ගසක් කඩා වැටීමෙන් සිදුවූ ආකාරයේ ශෝචනීය සිදුවීමක් මහනුවර ප්‍රදේශයෙන් වාර්තා නොවීම පිණිස තමා මේ කාරණය අවධාරණය කරන බවත් ගමගේ මහතා වැඩි දුරටත් සඳහන් කළේය. මධ්‍යම පළාත් ආණ්ඩුකාර නීතීඥ ලලිත් යූ. ගමගේ මහතා මේ අදහස් පල කළේ පසුගියදා (24) පෙරවරුවේ මහනුවර දිස්ත්‍රික් ලේකම් කාර්යාලයීය ශ්‍රවනාගාරයේදී පැවැති මහනුවර දිස්ත්‍රික් සම්බන්ධිකරණ කමිටු රැස්වීමේ සම සභාපතිවරයා ලෙස සහභාගී වෙමිනි. කමිටුවේ සම සභාපති පාර්ලිමේන්තු මන්ත්‍රී ගුණතිලක රාජපක්ෂ මහතාගේද ප්‍රධානත්වයෙන් පැවැති මෙම කමිටු රැස්වීමට පාර්ලිමේන්තු මන්ත්‍රීවරුන් වන මහාචාර්ය රන්ජිත් බණ්ඩාර හා නීතීඥ වසන්ත යාපා බණ්ඩාර යන මහත්වරුද සහභාගී වී සිටියහ. පසුගිය කමිටු රැස්වීමේදී පැන නැඟුණු කරුණු හා එළැඹි තීරණ වල ප්‍රතිඵල හා වත්මන් තත්ත්වය කෙරෙහි අවධානය යොමු කරමින් මෙවර කමිටු රැස්වීම ආරම්භ කෙරිණි. ලංකා ගමන මණ්ඩලයේ බස් රථ සඳහා මහනුවර දිස්ත්‍රික්කයෙන් රියදුරන් හා කොන්දොස්තරවරුන් බඳවා ගැනීම, ගොහාගොඩ මාර්ග ප්‍රතිසංස්කරණය, ගෙලිඔය නගරයේ විදුලි කණු ඉවත් කිරීම, මහනුවර උතුර / පාතදුම්බර ඒකාබද්ධ ජල සම්පාදන ව්‍යාපෘතියේ පොම්පාගාර සඳහා විදුලිය ලබා ගැනීම, අංකෙලිපිටිය ජල යෝජනා ක්‍රමය ක්‍රියාත්මක කිරීම, බෝගම්බර වටරවුමේ සිට හෙද විදුහල දක්වා මාර්ගය සංවර්ධනය කිරීම, මහනුවර නගරයේ පෝස්ටර් ඇලවීම විධිමත් කිරීම ආදී කාරණායි මෙසේ පසු විපරම් කෙරුනේ. මෙවර රැස්වීම වෙත ඉදිරිපත් කළ ලිපි, යෝජනා හා ගැටලු දීර්ඝ වශයෙන් සාකච්ඡා කෙරුණේ අවශ්‍ය විසඳුම් මාර්ග ද හඳුනා ගනිමිනි. මේ අනුව තෙල්දෙනිය බස් රථ නැවතුම්පොළ හා වැලිපොල පිළිබඳ ගැටලුව , නගරාශ්‍රිත පදික වේදිකාවල වෙළෙඳාම් කිරීම, රජයේ ඉඩම්වල ඇති අනතුරුදායක ගස් ඉවත් කිරීම, අරුප්පොල ධර්මාශෝක මාවතේ නව බස් රථ සේවයක් ආරම්භ කිරීම, ගන්නොරුව ප්‍රදේශයේ අනවසර ඉදි කිරීම්, පළාත් පාලන ආයතනවල අරමුදල් පරිපාලනය, කඩුගන්නාව නගර සභා ආදාහනාගාරය නවීකරණය, පොත්තපිටිය නව කර්මාන්තපුරයේ යටිතල පහසුකම් සහතික කිරීම, කොටලිගොඩ ප්‍රජා ජල යෝජනා ක්‍රමයේ කාර්යයන් නිම කිරීම, හන්තාන වතු යායේ හරිත භූමි ඉඩම්ලාභීන්ගේ ගැටලු, උඩදුම්බර පෝප්පිටිය ගම වනජිවී කලාපයෙන් නිදහස් කර ගැනීම, වීථි පහන් නඩත්තුව යන කාරණා සම්බන්ධයෙන් සාකච්ඡා කෙරුණේ විසඳුම් සපයා ගත හැකි ආකාර ද අවධානයට ලක් කරමිනි. මහනුවර බහුවිධ ප්‍රවාහන ව්‍යාපෘතිය සම්බන්ධයෙන් එහි ප්‍රධානින් විසින් සවිස්තර විග්‍රහයක් ඉදිරිපත් කළ අතර කමිටුව තීරණය කළේ මහනුවර දිස්ත්‍රික් ලේකම්ගේ ප්‍රධානත්වයෙන් යුතු හමුවකදී වැඩි දුර කරුණු විමසා බැලීමටය. මහනුවර් දිස්ත්‍රික්කයේ ආරක්ෂක තත්ත්වය පිළිබඳ පොලිස් ප්‍රධානින් විසින් කරුණු ඉදිරිපත් කළහ. මහනුවර දිස්ත්‍රික්කයට අදාළව පසුගිය මස තුළදී වාර්තා වූ ඩෙංගු රෝගීන්ගේ සංඛ්‍යාව 372 ක් බවත් මරණ කිසිවක් වාර්තා නොවූ බවත් සෞඛ්‍ය අංශ ඉදිරිපත් කළ වාර්තාවේ සඳහන් විය. සෞඛ්‍ය බලධාරීන් ප්‍රකාශ කළේ මෙම සංඛ්‍යා ලේඛනවලට අනුව මහනුවර දිස්ත්‍රික්කයේ ඩෙංගු රෝග ව්‍යාප්තියේ අඩුවීමක් දක්නට ලැබෙන බවයි. මධ්‍යම පළාත් ප්‍රධාන ලේකම් අජිත් ප්‍රේමසිංහ, මහනුවර දිස්ත්‍රික් ලේකම් චන්දන තෙන්නකෝන් යන මහත්වරු ඇතුළු මධ්‍යම පළාත් අමාත්‍යංශ හා දෙපාර්තමේන්තු ප්‍රධානීහුද, මහනුවර දිස්ත්‍රික්කයේ ප්‍රාදේශීය ලේකම්වරුද මහනුවර අර්ධ රාජ්‍ය ආයතන ප්‍රධානීහුද කමිටු රැස්වීම සඳහා සහභාගී වී සිටියහ.

මධ්‍යම පළාතේ නිෂ්පාදකයින් සහ සේවා සපයන්නන් ජාතික හා ජාත්‍යන්තර වෙළෙඳපොළ හා සම්බන්ධ කරවීමේ අරමුණින් සංවිධානය කළ Buyer- Seller Meet -2023 වැඩසටහන පසුගියදා (25) මහනුවර සිටි සෙන්ටර් (Kcc)හි දී පළාත් ආණ්ඩුකාර නීතිඥ ලලිත් යූ. ගමගේ මහතාගේ ප්‍රධානත්වයෙන් සහ මධ්‍යම පළාත් ප්‍රධාන ලේකම් අජිත් ප්‍රේමසිංහ මහතාගේ සහභාගිත්වයෙන් පැවැත්විණ. මෙම වැඩසටහන සඳහා මධ්‍යම පළාතේ විවිධ අංශයන් නියෝජනය කරමින් අපනයනය සඳහා යොමු වීමට අපේක්ෂිත ව්‍යවසායකයින් සියදෙනෙකු පමණ ද, ශ්‍රී ලංකා අපනයන වාණිජ මණ්ඩලය හා ක්‍රියාත්මක වන විවිධ අංශ නියෝජනය කරමින් අපනයනකරුවන් පහළොස් දෙනෙකු ද සහභාගි වූහ. මීට අමතරව මධ්‍යම පළාතේ මේ වන විටත් විවිධ අංශයන්ගෙන් භාණ්ඩ අපනයනය සිදු කරනු ලබන අපනයනකරුවන් පහළොස් දෙනකු පමණ ද සහභාගි වූහ. මෙහිදී නිෂ්පාදකයින් සහ අපනයනකරුවන් එකම වේදිකාවකදී ජාලගත කරමින් මධ්‍යම පළාතේ සිදු කරනු ලබන නිෂ්පාදනයන් වැඩි වශයෙන් ආනයනය සඳහා යොමු කිරීමට එම නිෂ්පාදන සාම්පල ඉදිරිපත් කෙරිණි. මීට අමතරව ජාත්‍යන්තර වෙළෙඳපොළේ පවතින ඉල්ලුම හා විභවතාව හඳුනාගනිමින් මධ්‍යම පළාතේ පවතින සම්පත් උපරිම අයුරින් ප්‍රයෝජනයට ගෙන අපනයනය සඳහා ව්‍යවසායකයින් උනන්දු කරලීමට හිතකර යාන්ත්‍රණයක් සකස් කිරීම සඳහා ආරම්භක පියවරක් වශයෙන් මෙම වැඩසටහන සංවිධානය කෙරිණි. මධ්‍යම පළාතේ සිදු කරනු ලබන විවිධ නිෂ්පාදන නිපැයුම් අපනයනය සඳහා යොමු කිරීමත්, මධ්‍යම පරිමාණ ව්‍යවසායකයින්, නිෂ්පාදකයින්, අපනයනකරුවන් හා ජාලගත කිරීමත්, පළාතේ පවත්නා සම්පත් උපයෝගී කරගනිමින් අපනයන වෙළෙඳපොළෙහි පවත්නා විභවතාවන් හඳුනාගනිමින් ඒ සඳහා ව්‍යවසායකයින් යොමුකිරීමත්, නිෂ්පාදන අපනයනය සඳහා යොමු කිරීමේදී බලපාන වෙනත් කරුණු සාකච්ඡා කිරීම, අපනයනය සඳහා අදාළ නිෂ්පාදනයන්හි ගුණාත්මක බව වර්ධනය කර ගැනීමට අවශ්‍ය කටයුතු සැලසුම් කිරීම හා ව්‍යවසායකයින් මුහුණදෙන ගැටලු සාකච්ඡා කිරීම යනාදිය මෙම වැඩසටහනට අන්තර්ගත විය. මෙහිදී අදහස් දැක්වූ ගමගේ මහතා මධ්‍යම පලාතේ සුළු හා මධ්‍ය පරිමාණ ව්‍යවසායකයන් නිෂ්පාදන අපනයනය තුළින් ආර්ථිකයට දක්වන දායකත්වය ඇගයීමට ලක් කළේය.එසේම අපනයන වෙළඳපොළ වැඩි දියුණු කර ආර්ථිකය ශක්තිමත් කිරීම කෙරෙහි අවධානය යොමු කළ යුතු බවත් ඒ සඳහා මෙම ව්‍යවසායකයින් ඒකාබද්ධ කර ගනිමින් ඉලක්කය වෙත ගමන් කළ යුතු බවත, එසේම ගැනුම්කරුවන්ගේ ආකර්ෂණය ඇති කර ගැනීම සඳහා අවධානය යොමු කිරීම ව්‍යාපාරික ප්‍රජාවගේ වගකීම බවත් වැඩිදුරටත් සඳහන් කළේය. මධ්‍යම පළාත් ප්‍රධාන හා අධ්‍යාපන අමාත්‍යාංශයේ ලේකම් මේනක හේරත් මහතාගේ උපදෙස් පරිදි සංවිධානය කළ මෙම වැඩසටහනට මධ්‍යම පළාත් ආණ්ඩුකාර ලේකම් මංජුලා මඩහාපොල මහත්මිය, කර්මාන්ත අමාත්‍යාංශයේ ලේකම් උපාලි රණවක මහතා, මධ්‍යම පළාතේ කලාපීය ආර්ථික සංවර්ධන ආයතනයේ සභාපති නීතිඥ ජානක සකලසූරිය මහතා, ශ්‍රී ලංකා අපනයන වාණිජ මණ්ඩලයේ නිලධාරීන්, පෞද්ගලික හා රාජ්‍ය අංශය නියෝජනය කරමින් නිලධාරීන් පිරිසක්ද සහභාගි වූහ.

ගලගෙදර, නියංගොඩ පේෂකර්මාන්ත මධ්‍යස්ථානයේ මුල්ම සිවුරු මහා සංඝරත්නයට පූජා කෙරේ