ගම්පොල චකින්දාරාම විහාරස්ථානයේ මෙහෙයවීමෙන් එළැඹෙන උදු‍වප් මස 10 දා ගම්පොල නගරයේ වීථි සංචාරය කිරීමට නියමිත ගම්පොල උදු‍වප් මහා පෙරහැර සංවිධානය කිරීම පිළිබද සාකච්ඡාවක් ඊයේ පෙරවරුවේ හතරබාගේ සමිත ස්වාමීන් වහන්සේ ඇතුලු මහා සංඝරත්නයේ මූලිකත්වයෙන් හා මධ්‍යම පළාත් ආණ්ඩුකාර නීතිඥ ලලිත් යූ.ගමගේ මහතාගේ සහභාගීත්වයෙන් පළාත් ආණ්ඩුකාර කාරයාලයීය ශ්‍රවණාගාරයේ දී ඊයේ (27 ) පැවැත්විණි .
මෙම පෙරහැර පළමු වරට සංවිධානය කෙරෙන්නේ ගම්පොල පුරවරයේ අතීත ශ්‍රී විභූතියේ මතකය ආවර්ජනය කරමින් මෙවර ශ්‍රී පාද වන්දනා සමයට සමගාමීව ය.
ව්‍යාපාරික ප්‍රජාවගේ හා මහජනතාවගේ සහය ඇතිව ප්‍රදේශයේ තරුණ කණ්ඩායමක් පෙරහැර සංවිධානය කරති.
ආණ්ඩුකාර ගමගේ මහතා කියා සිටියේ දේශයේ බෞද්ධ අනන්‍යතාව පිළිබිඹු කරන මෙබදු කාර්‍යයන් සඳහා උපරිම සහය ලබා දීමට මධ්‍යම පළාත් සභාව සූදානම් බවය.
සාකච්ඡාව සඳහා පළාත් ප්‍රධාන හා අධ්‍යාපන අමාත්‍යාංශ ලේකම් අජිත් ප්‍රේමසිංහ, පළාත් අධ්‍යාපන අධ්‍යක්ෂ අමරසිරි පියදාස හා පළාත් පාලන කොමසාරිස් මේනක හේරත් යන මහත්වරුද , ගම්පොල ජ්‍යෙෂ්ඨ පොලිස් අධිකාරි හා මූලස්ථාන පොලිස් පරීක්ෂක මහත්වරුද , පෙරහැර සංවිධානයට එක්වන පිරිස්ද එක්ව සිටියහ .
