රාජ්‍ය කළමනාකරණ සේවයේ අධි ශ්‍රේණියේ තනතුරු සදහා අභිනවයෙන් පත් කෙරුණු මධ්‍යම පළාත් රාජ්‍ය සේවයේ නිරත නිලධාරීන් හා නිලධාරිනියන් 14 දෙනෙකුට නව සේවා ස්ථාන වෙත පත් කිරීමේ ලිපි ප්‍රදානය ඊයේ(27) මධ්‍යම පළාත් ආණ්ඩුකාර නීතිඥ ලලිත් යූ.ගමගේ මහතා විසින් පළාත් ආණ්ඩුකාර කාර් යාලයීය ශ්‍රවණාගාරයේ දී සිදු කරනු ලැබීය.
මෙහිදී නව තනතුරු ලාභීන් අමතා ආණ්ඩුකාර ගමගේ මහතා කියා සිටියේ නිවැරදි ව හා කාර් යක්ෂමව මහජන සේවයේ නිරත වෙමින්‍ රාජ්‍ය සේවයට අභිමානයක් එක් කරන ලෙසය. සේවයේ නිරතව සිටියදීත්, විශ්‍රාම ගැනීමෙන් පසුවත් මෙවැනි නිලධාරීනට ඉහළ පිළිගැනීමක් සමාජයෙන් ලැබෙන බවත් ඔහු කියා සිටියේය.
පළාත් ප්‍රධාන ලේකම් ගාමිණි රාජරත්න මහතා සදහන් කළේ සතතාභ්‍යාසයෙන්ම රාජ්‍ය සේවයේ පරිණත වූ මෙම නිලධාරීනට විශාල වගකීමක් පැවරෙන බවය.
පත්වීම් ප්‍රදානයට අදාළ සියලු කටයුතු සිදු කරනු ලැබුවේ මධ්‍යම පළාත් රාජ්‍ය සේවා කොමිෂන් සභාව විසිනි.
ආණ්ඩුකාර ලේකම් ඇන්ටන් තිලකරත්න මහතාද, පළාත් රාජ්‍ය සේවා කොමිෂන් සභාවේ සභාපති පී.ජී.අමරකෝන් මහතා ඇතුළු එහි සාමාජිකයන්ද, එහි ලේකම් ඩබ්ලිව්.දයානන්ද මහතාද මේ අවස්ථාවට එක්ව සිටියහ.
