මල්වතු - අස්ගිරි මහා විහාරයීය උපසම්පදා අපේක්ෂිත භික්ෂූන් වහන්සේලා වෙනුවෙන් එක්දින පුහුණු වැඩමුළුවක්.
මල්වතු - අස්ගිරි මහා විහාරයීය උපසම්පදා අපේක්ෂිත භික්ෂූන් වහන්සේලා වෙනුවෙන් එක්දින පුහුණු වැඩමුළුවක්.
මල්වතු මහා විහාරයීය හා අස්ගිරි මහා විහාරයීය උපසම්පදා අපේක්ෂිත භික්ෂූන් වහන්සේලා වෙනුවෙන් වූ එක්දින පුහුණු වැඩමුළුවක් ඉකුත් ( 23) මහනුවර ශ්‍රී දළඳා මාළිගා පරිශ්‍රයේ බහුකාර්ය ගොඩනැඟිලි ශ්‍රවණාගාරයේදී මල්වතු- අස්ගිරි නායක ස්වාමීන් වහන්සේලාගේ ප්‍රධානත්වයෙන් පැවැත්විණි. මේ සඳහා උපසම්පදා අපේක්ෂිත භික්ෂූන් වහන්සේලා විශාල පිරිසක් වැඩම කොට සිටියහ.
වාර්ෂිකව පැවැත්වෙන මේ වැඩමුළුව මෙවර පැවැත්වූයේ දෙවසරකට පසුව ය. මල්වතු - අස්ගිරි මහා නායක ස්වාමීන් වහන්සේලා ප්‍රමුඛ කාරක සංඝ සභා තීරණය යටතේ යි වැඩමුළුව සංවිධානය කෙරුණේ.
මෙහිදී උපසම්පදා අපේක්ෂිත භික්ෂූන් වහන්සේ වෙත ඒ ඒ මඟ පෙන්වීම්, විනය කර්ම කටයුතු, ආචාර ධර්ම , ඇවතුම් පැවතුම් සම්බන්ධයෙන් පුළුල් දැනුමක් ලබා දෙනු ලැබී ය.
මධ්‍යම පළාත් ආණ්ඩුකාර නීතීඥ ලලිත් යූ. ගමගේ මහතා ද, ශ්‍රී දළඳා මාළිගයේ දියවඩන නිලමේ ප්‍රදීප් නිලංග දෑල මහතා හා බස්නායක නිලමේවරු ද , මහනුවර දිස්ත්‍රික් ලේකම් චන්දන තෙන්නකෝන් මහතා ද වැඩමුළුවේ සමාරම්භක අවස්ථාවට එක්ව සිටියහ.
