නවීකරණය කළ මිනිපේ මහජන පුස්තකාලය පාඨක අයිතියට.

නවීකරණය කළ මිනිපේ මහජන පුස්තකාලය පාඨක අයිතියට ජංගම දුරකථන භාවිතයට අසීමිතව ඇබ්බැහි වී සිටින දරුවන් ඉන් මුදවා ගැනීම සඳහා පවතින හොඳම හා සාර්ථකම විකල්පය පුස්තකාල භාවිතය වන බවත්, නැණ නුවණින් සපිරි පුරවැසියන් අනාගතය වෙනුවෙන් නිර්මාණය කරලීමට ඉන් සානුබල සැපයෙන බවත් මධ්‍යම පළාත් ආණ්ඩුකාර නීතිඥ ලලිත් යූ. ගමගේ මහතා පසුගියදා (07) හසලකදී පවසයි. ආණ්ඩුකාර ගමගේ මහතා මෙසේ අදහස් දැක්වූයේ මිනිපේ ප්‍රාදේශීය සභාව, ප්‍රදේශයේ ව්‍යාපාරික ප්‍රජාවගේ හා පරිත්‍යාගශීලීන්ගේ මූල්‍යාධාර උපයෝගී කොට ගෙන නවීකරණය කළ හසලක, මිනිපේ මහජන පුස්තකාල ගොඩනැගිල්ල පාඨක අයිතියට පත් කරලීමේ අවස්ථාවට ප්‍රධාන ආරාධිතයා ලෙස එක්වෙමිනි.මෙයට සමගාමීව යෝජිත නව කියවීම් ශාලා ගොඩනැගිල්ල සදහා මුල්ගල් තැබීමද ආණ්ඩුකාර ගමගේ මහතා විසින් සිදුකරන ලදී.අමාත්‍ය ලොහාන් රත්වත්තේ මහතාගේ සම්බන්ධිකරණ ලේකම් කමල් බෙලිගොල්ල මහතාද, පළාත් ප්‍රධාන හා අධ්‍යාපන අමාත්‍යාංශයේ ලේකම් මේනක හේරත් මහතා හා පළාත් ආණ්ඩුකාර ලේකම් මංජුලා මඩහපොල මහත්මියද, පළාත් පාලන කොමසාරිස් චමිලා අතපත්තු මහත්මිය හා මහනුවර දිස්ත්‍රික් සහකාර පළාත් පාලන කොමසාරිස් නිලූකා බුලත්ගේ මහත්මියද, මිනිපේ ප්‍රාදේශීය සභාවේ ලේකම් නිමල් මහවත්ත මහතා හා ප්‍රාදේශීය සභා කාර්ය මණ්ඩලයද, පාඨකයන් ඇතුළු ප්‍රදේශවාසීහුද මේ අවස්ථාවට එක්ව සිටියහ.