ගලේවෙල සෞඛ්‍ය මධ්‍යස්ථානය හා ඉඩම පිළිබඳව දීර්ඝ කාලීනව පැවති ගැටළුව නිරාකරණය කිරීමට මධ්‍යම පළාත් ආණ්ඩුකාරවර ලලිත් යු ගමගේ මහතා මැදිහත් වෙයි.
ගලේවෙල ප්‍රාදේශීය රෝහල යටතේ පරිපාලනය වන ගලේවෙල සෞඛ්‍ය මධ්‍යස්ථානය හා ඉඩම පිළිබඳව දීර්ඝ කාලීනව පැවති ගැටළුව නිරාකරණය කිරීමට මධ්‍යම පළාත් ආණ්ඩුකාරවර ලලිත් යු ගමගේ මහතා මැදිහත් වෙයි.
දැනට ගලේවෙල සෞඛ්‍ය මධ්‍යස්ථානය පවත්වාගෙන යන ඉඩම ඒ ආසන්නයේ පිහිටි ධර්මදුත විහාරස්ථානයේ සාසනික කටයුතු වෙනුවෙන් යොදා ගැනීම සදහා අවශ්‍යතාවය දන්වමින් විහාරාධිපති හිමියන් විසින් විටින් විට විවිධ ආයතන වෙත දන්වා ඇති අතර , මෙම ස්ථානයේ ආගමික කටයුතු වෙනුවෙන් යොදා ගැනීමට අවශ්‍ය පසුබිම උදාකරමින් සෞඛ්‍ය මධ්‍යස්ථානය විකල්ප ස්ථානයක් වෙත ගෙන යාමට මධ්‍යම පළාත් ආණඩුකාරවර ගමගේ මහතා පියවර ගනු ලැබුවේ පසුගිය 10 වන දින ඒ මහතාගේ ප්‍රධානත්වයෙන් මධ්‍යම පළාත් ආණ්ඩුකාර කාර්යාලයේ පැවැති විශේෂ සාකච්ඡාවක් අතරතුරදීය.
මෙහිදී සෞඛ්‍ය අමාත්‍යාංශයේ ලේකම් ජගත් අධිකාරී මහතා කරුණු දක්වමින් පෙන්වාදී දුන්නේ පවතින තත්ත්වය අනුව ඉදිරි සංවර්ධන කටයුතුවලට හිතකරවන ලෙස සෞඛ්‍ය මධ්‍යස්ථානය ඉදිකරවා එමගින් වඩා පලදායී සේවයක් ප්‍රදේශයට ලබාදීමට හැකිවන ලෙස කටයුතු යෙදීම කාලීන අවශ්‍ යතාවයක් වන බවයි.
ඒ සඳහා භූමියක් මේ වන විට හඳුනාගෙන ඇති බවත් එහි නීතිමය කටයුතු සනාථ කර ගැනීමෙන් අනතුරුව සෞඛ්‍ය මධ්‍යස්ථානය හා සෞඛ්‍ය සේවාවේ ප්‍රගමනය වෙනුවෙන් පියවර ගැනීම උචිත බව මාතලේ දිස්ත්‍රික් සෞඛ්‍ය සේවා අධ්‍යක්ෂ චමින්ද විරකෝන් මහතා පෙන්වා දෙන ලදී.
මෙහිදී ආණ්ඩුකාරවර ගමගේ මහතා අදාළ සියල්ල සියලු කරුණු සලකා බලා වඩා ජනතා හිතවාදී සෞඛ්‍ය යාන්ත්‍රණයක් වෙනුවෙන් අවශ්‍ය කටයුතු කඩිනමින් සිදුකිරීමට පසුබිම උදාකර ගැනීම කාලෝචිත බවත්, ඒ සඳහා පවතින නීතිමය කටයුතු කඩිනමින් සිදු කිරීමට මෙහිදී අදාළ නිලධාරීන්හට උපදෙස් ලබාදෙන ලදී.
මෙම අවස්ථාවට ආණ්ඩුකාර ලේකම් මංජුලා මඩහපොළ, ප්‍රධාන හා අධ්‍යාපන අමාත්‍යංශයේ ලේකම් මේනක හේරත්, සෞඛ්‍ය අමාත්‍යාංශයේ ලේකම් ජගත් අධිකාරි,සෞඛ්‍ය සේවා අධ්‍යක්ෂ නිහාල් වීරසුරිය , මාතලේ දිස්ත්‍රික් සෞඛ්‍ය සේවා අධ්‍යක්ෂ චමින්ද විරකෝන් යන මහත්ම මහත්මීන් ඇතුළු පිරිසක් සහභාගී විය.
