උඩුදුම්බර ප්‍රාදේශීය ලේකම් කොට්ටාශයට අයත් මීමුරේ, කයිකාවල හා පුස්සෙඇල යන ග්‍රාම නිලධාරි වසම් වල වෙසෙන ජනතාව මුහුණ දී සිටින ඉඩම් හිමිකම් පිළිබද ගැටලු නිරාකරණයට මෙතෙක් ගත් පියවර හා ගැනීමට නියමිත පියවර සම්බන්ධයෙන් අදහස් හුවමාරු කර ගනිමින් එකඟතාවකට පැමිණීමේ අරමුණෙන් යුතු සාකච්ඡාවක් අද දින (28) පළාත් ආණ්ඩුකාර කාර් යාලයීය ශ්‍රවණාගාරයේදී මධ්‍යම පළාත් ආණ්ඩුකාර නීතිඥ ලලිත් යු.ගමගේ මහතාගේ ප්‍රධානත්වයෙන් පැවැත්විණි.
උඩුදුම්බර ප්‍රාදේශීය සභාවේ සභාපති ඒ.පී.බී.මඩුගල්ලේ හා ප්‍රාදේශීය සභා මන්ත්‍රී කිත්සිරි විජේකෝන් යන මහත්වරුද සහභාගී වූ මේ සාකච්ඡාවට ආණ්ඩුකාර ලේකම් ඇන්ටන් තිලකරත්න ,මහනුවර දිස්ත්‍රික් ලේකම් චන්දන තෙන්නකෝන් , පළාත් නියෝජ්‍ය ප්‍රධාන ලේකම් මංජුලා මඩහපොල , ඉඩම් හිමිකම් නිරවුල් කිරීමේ දෙපාර්තමේන්තුවේ සහකාර කොමසාරිස් (විමර්ශන ) එස්.බී.මියනදෙණිය, පළාත් ඉඩම් කොමසාරිස් ජගත් අධිකාරි උඩුදුම්බර ප්‍රාදේශීය ලේකම් නිලූෂා මනෝරත්න යන මහත්ම මහත්මීහුද එක්ව සිටියහ. රේඩා ආයතනයේ සභාපති නීතිඥ ජානක සකලසූරිය මහතා මීමුරේ පාදක වූ සංචාරක පහසුකම් පිළිබද ව කරුණු ඉදිරිපත් කලේය.
ප්‍රාදේශීය ලේකම් මනෝරත්න මහත්මිය උක්ත ඉඩම් ගැටලුව ට අදාළ වර්තමාන තත්ත්වය දීර්ඝව පැහැදිලි කළාය.
ආණ්ඩුකාර ගමගේ මහතා අදහස් දක්වමින් කියා සිටියේ මේ ගැටලුව හා බැඳුනු සියලු ආයතන හා පාර්ශ්ව අතර එකඟතාවක් ඇති කරගෙන මීමුරේ කයිකාවල හා පුස්සෙඇල ජනතාව සමඟ සාකච්ඡා කොට නිශ්චිත තීරණයකට පැමිණීම වඩා ඵලදායි වන බවයි.
ඒ අනුව අදාළ ඉඩම් සඳහා වූ මැනුම් කටයුතු නොපමාව අවසන් කිරීමටත් , පළාත් ඉඩම් කොමසාරිස් මඟින් වාර්ෂික ඉඩම් බලපත්‍ර නිකුත් කිරීම වේගවත් කිරීමටත් කටයුතු කළ යුතු බව කියැවිණි. නොවැම්බර් 15දා පෙරවරුවේ මීමුරේ ප්‍රජා ශාලාවේදී අදාළ සියලු නිලධාරීන් සමඟ ජනතාව හමුවී අවසන් එකඟතාවකට පැමිණීමටද තීරණය විය.
