මධ්‍යම පළාත් කෘෂිකර්ම අමාත්‍යාංශයට නව ලේකම්වරයෙක් පත්කෙරේ.
මධ්‍යම පළාත් කෘෂිකර්ම, සුළු වාරිමාර්ග, සත්ත්ව නිෂ්පාදන හා සංවර්ධන, ගොවිජන සංවර්ධන, මිරිදිය ධීවර, පරිසර කටයුතු, හින්දු සංස්කෘතික හා වතු යටිතල පහසුකම් අමාත්‍යාංශලේ නව ලේකම්වරයා වශයෙන් ශ්‍රී ලංකා පරිපාලන සේවයේ විශේෂ ශ්‍රේණියේ නිලධාරියෙකු වන චන්දන වික්‍රමසූරිය මහතා පත් කර ඇත. ඒ අනුව නව ලේකම්වරයා සදහා පත්වීම් ලිපි ප්‍රදානය කිරීම මධ්‍යම පළාත් ආණ්ඩුකාරවර නීතීඥ ලලිත් යු ගමගේ මහතාගේ ප්‍රධානත්වයෙන් මහනුවර පිහිටි පළාත් ආණ්ඩුකාර කාර්යාලයේදී (28) සිදු විය.එහිදී අදහස් දක්වමින් පළාත් ආණ්ඩුකාරවරයා සදහන් කර සිටියේ, කෘෂිකර්ම අමාත්‍යාංශය රජයේ ඉදිරි සංවර්ධන සැලසුම් අනුව ප්‍රමුඛ අවධානයක් හිමිවන ක්ෂේත්‍රයක් වන බවත්, එම නිසා එම අමාත්‍යාංශයේ කටයුතු කිරීමේදී නිසියාකාර සැලස්මක් සකස් කර ගනිමින් විධිමත් ලෙස එම කටයුතු මෙහෙයවීම අවශ්‍ය වන බවය. මධ්‍යම පළාත කෘෂිකාර්මික වශයෙන් ඉතා ඉහල වටිනාකමක් සහිත පළාතක් බවත්, කෘෂිකර්ම අමාත්‍යාංශය හා අනුබද්ධිත ක්ෂේත්‍රයන් සම්බන්ධයෙන් ද මනා අවබෝධයකින් යුතුව කටයුතු කරන ලෙසත් මෙහිදී ආණ්ඩුකාරවරයා වැඩිදුරටත් අදහස් දක්වමින් ප්‍රකාශ කර සිටියේය.මෙම අවස්ථාව සදහා පළාත් ප්‍රධාන ලේකම් අජිත් ප්‍රේමසිංහ, පළාත් ආණ්ඩුකාර ලේකම් මංජුලා මඩහපොල, පළාත් රාජ්‍ය සේවා කොමිෂන් සභාවේ ලේකම් එස්.කුමුදුණී යන මහත්ම මහත්මීන් ද එක් ව සිටියේය.
