මධ්‍යම පළාත් කර්මාන්ත සංවර්ධන හා ව්‍යාපාර ප්‍රවර්ධන දෙපාර්තමේන්තුවේ වෘත්තීය පුහුණු ආයතනවල පුහුණු ලාභීන් සඳහා සහතික පත්‍ර ප්‍රදානය කිරීම උත්සවය මධ්‍යම පළාත් ආණ්ඩුකාර මහාචාර්ය එස්.බී.එස්.අභයකෝන් මහතාගේ ප්‍රධානත්වයෙන් මහනුවර දිස්ත්‍රික් ලේකම් කාර්යාල ශ්‍රවණාගාරයේදී (19) පැවැත්විණී.

ඇසළ පෙරහර මංගල්‍යය ජූලි 25 කප් සිටුවීමෙන් ඇරඹේ මහනුවර ඇසළ පෙරහර මංගල්‍යය නාථ, විෂ්ණු, කතරගම හා පත්තිනි යන සිව් මහා දේවාලයන්හි ජූලි මස 25 දින උතුරු දිශාභිමුඛව පෙරවරු 6.05 ට සුබ නැකතට කප් සිටුවීමෙන් ආරම්භ වන බව දියවඩන නිළමේ ප්‍රදීප් නිලංග දෑල මහතා පැවසීය.මහනුවර ඇසළ පෙරහර වීදී සංචාරය කරන දින වකවානු දැනුම්දීම සහ ඊට අදාළ සංවිධාන කටයුතු සාකච්ඡා කිරීම වෙනුවෙන් (19) ශ්‍රී දළදා මාලිගාවේ රන් ආවුද මණ්ඩපයේ දී පැවැති සාකච්ඡාවේදී දියවඩන නිළමේ ප්‍රදීප් නිලංග දෑල මහතා මෙම තොරතුරු අනාවරණය කෙරිණි. ඒ අනුව දේවාල අභ්‍යන්තර පෙරහර දින 05 ක් පැවැත්වීමෙන් පසු ප්‍රථම කුඹල් පෙරහර ජූලි 30 දින වීදී සංචාරය කරයි.කුඹල් පෙරහර ජූලි 30 සිට අගෝස්තු 03 දක්වා වීදී සංචාරය කිරීමෙන් පසු අගෝස්තු 04 දින ප්‍රථම රන්දෝලි පෙරහර වීදී සංචාරය කරන අතර අවසන් රන්දෝලි මහ පෙරහර නිකිණි පුන්පොහෝ දිනය යෙදෙන (08) දා රාත්‍රියේ වීදී සංචාරය කරයි.අවසන් රන්දෝලි මහ පෙරහර ගෙවැදීමෙන් පසු දිය කැපුම් මංල්‍යය සඳහා සතර මහා දේවාල පෙරහර ගැටඹේ දියකපනා තොට දක්වා ගමන් ගන්නා අතර දිය කැපීමේ චාරිත්‍රයෙන් පසු දවල් පෙරහර 09 දින වීදි සංචාරය කිරීමෙන් මෙවර පෙරහර මංගල්‍යය නිමාවට පත්වන බව දියවඩන නිළමේ ප්‍රදීප් නිලංග දෑල මහතා පැවසීය. පෞරාණික චාරිත්‍රානුකූලව පෙරහර මංගල්‍යය සාර්ථකව පවත්වා අවසන් කළ බව දැක්වෙන පෙරහර සංදේශය ජනපතිවරයාට පිළිගැන්වීම 09 දින පස්වරුවේ මහනුවර ජනපති මන්දිරයේදී සිදු කෙරේ.බස්නායක නිළමේ එස්.ඩබ්ලිව් බණ්ඩාරනායක, විෂ්ණු දේවාලයේ බස්නායක නිළමේ මහේන් රත්වත්තේ, කතරගම දේවාලයේ බස්නායක නිළමේ දමින්ද උඩුරාවණ, පත්තිනි දේවාලයේ බස්නායක නිළමේ හේමන්ත බණ්ඩාර,මධ්‍යම පළාත් ප්‍රධාන ලේකම් අජිත් ප්‍රේමසිංහ, මහනුවර දිස්ත්‍රික් ලේකම් ඉන්දික උඩවත්ත, යන මහත්වරුන් ඇතුළු පිරිසක් මෙම අවස්ථාවට සහභාගි වූහ. ජායාරූප - ශ්‍රී දළදා මාලිගාව, මාධ්‍ය කාර්යාංශය

ජාත්‍යන්තර යෝග දිනයට සමගාමිව මහනුවර ඉන්දියානු සහකාර මහකොමසාරිස් කාර්යාලය හා මහනුවර මහ නගර සභාව එක්ව සංවිධානය කරන ලද යෝග දින සැමරුම් වැඩසටහනක් මහනුවර නියෝජ්‍ය නගරාධිපති ජී.ජී.රුවන් කුමාර මහතාගේ ප්‍රධානත්වයෙන් නගර ශාලාවෙිදී පසුගියදා (17) පැවැත්විණි. කාලීනව ඉහල යන බෝනොවන රෝග සදහා කාලින විසදුමක් ලෙස ආහාර රාටාව හා ශාරීරික අභ්‍යාසයේ නිරතවීමේ වැදගත්කම පිළිබදවත්, යෝග අභ්‍යාස හා ආහාර පාලනය තුළින් කායික හා මානසික නීරෝගීව තබා ගැනීම වෙනුවෙන් දැනුවත් කිරීමේ දේශන කිහිපයක් ද මෙම වැඩසටහනේ දී පැවැත්විය.

මධ්‍යම පළාත් පාරිසරික කෙටි චිත්‍රපට හා වාර්තා චිත්‍රපට තරගාවලිය සහ පාරිසරික චිත්‍රපට උළෙ 2025 මධ්‍යම පළාත් සභාවේ පරිසර අමාත්‍යාංශය, ජාතික චිත්‍රපට සංස්ථාව, පේරාදෙණිය විශ්වවිද්‍යාලයේ ලලිත කලා අධ්‍යයන අංශය ඒකාබද්ධ වී සංවිධානය කරනු ලබන පාරිසරික කෙටි චිත්‍රපට හා වාර්තා චිත්‍රපට තරගාවලිය සහ පාරිසරික චිත්‍රපට උළෙලේ ඉදිරි කටයුතු පිළිබඳ මූලික සාකච්ඡාවක් මධ්‍යම පළාත් කෘෂිකර්ම හා පරිසර අමාත්‍යාංශයේදී පසුගියදා (11) පැවැත්විණි.මෙම තරගාවලියේ විනිශ්චය කටයුතු සිදු කරනු ලබන්නේ චිත්‍රපට අධ්‍යක්ෂකවරුන් වන සරත් ධර්මසිරි,මොහාන් නියාස්, අජිත් පී. ධර්මසූරිය, ප්‍රවීණ චිත්‍රපට විචාරක තුසිත ජයසුන්දර සහ පේරාදෙණිය විශ්ව විද්‍යාලයේ මහාචාර්ය සුදර්ශන බණ්ඩාර මහත්වරුන් විසිනි.තරඟයට අදාළ තරග කොන්දේසි හා නීතිරීති චිත්‍රපට තරගාවලිය පැවැත්වෙන ආකාරය හා චිත්‍රපට උළෙල පැවැත්වෙන දිනය සම්බන්ධයෙන් මෙහිදි සාකච්ඡාවට ලක්කෙරිණි.තරගකරුවන් ලියාපදිංචිය ඉදිරියේදි සිදු කරන අතර පේරාදෙණිය විශ්වවිද්‍යාලයේදී සහ තෝරාගත් ස්ථානවලදී චිත්‍රපට සංස්ථාව මගින් චිත්‍රපට කරණය හා වාර්තා චිත්‍රපටකරණය සම්බන්ධ වැඩමුළු ද පැවැත්වීමට අපේක්ෂා කෙරේ.මෙම අවස්ථාව සඳහා අධ්‍යාපන දෙපාර්තමේන්තුවේ සහකාර අධ්‍යක්ෂක දිලානි කරුණාරත්න මහත්මිය සහ A pictures ආයතනයේ සභාපති අතුල ජයසුන්දර මහතා ද සහ කෘෂිකර්ම අමාත්‍යාංශයේ සහකාර අධ්‍යක්ෂ (ක්‍රමසම්පාදන) චමින්ද අබේරත්න මහතා ඇතුළු පිරිසක් එක්විය.