මධ්‍යම පළාත් ආණ්ඩුකාරවරයා සහ මධ්‍යම පළාතේ යුද හමුදා ආඥාපතිවරයා අතර හමුවක්... මධ්‍යම පළාත් ආණ්ඩුකාරවර මහාචාර්ය එස්.බී.එස්. අභයකෝන් මහතා සහ දියතලාව පිහිටි, යුද හමුදා ආරක්ෂක සේනා මූලස්ථානයේ (මධ්‍යම), ආඥාපති මේජර් ජනරාල් වයි.ඒ.බී එම්.යහම්පත් මහතා අතර හමුවක් මහනුවර ආණ්ඩුකාර කාර්යාලයේදී (14) පැවැත්විණි. මෙහිදී මධ්‍යම පළාත් ආණ්ඩුකාරවරයා සහ මධ්‍යම පළාත ආඥපතිවරයා අතර මධ්‍යම පළාතේ ආරක්ෂාව, ආපදා කළමනාකරණය සහ මැතිවරණ කටයුතු ඇතුළු කරුණු සම්බන්ධයෙන් සුහද සාකච්ඡාවක් පැවැත්විණී. මෙම අවස්ථාව සඳහා මධ්‍යම පළාත් ආණ්ඩුකාර ලේකම් මංජුලා මඩහපොළ මහත්මිය, පල්ලේකැලේ, යුද හමුදා කඳවුරේ, 11 පාබල සේනාංකයේ සේනාංකාධිපති, මේජර් ජනරාල් උපුල් කොඩිතුවක්කු මහතා ඇතුළු නිලධාරීන් පිරිසක් එක් වූහ.

සංචාරක ප්‍රවර්ධනය අරමුණු කරගෙන පළාත් පාලන මගින් නව වැඩපිළිවෙලක්. සමාජ මාධ්‍ය හරහා සංචාරක ආකර්ෂය හා ප්‍රවර්ධනය අරමුණු කරගෙන,පළාත් පාලන ආයතන සදහා ආදායම් උත්පාදනයටත්,පළාත් පාලන ආයතනවල නිලධාරීන්ගේ දැනුම,කුසලතා හා ආකල්ප වැඩි දියුණු කිරීම වෙනුවෙන් වැඩමුළුවක් පසුගියදා (11) පළාත් පාලන කොමසාරිස් ඒ.එම්.කේ.සී.කේ.අතපත්තු මහත්මියගේ මගපෙන්වීමෙන් නවයාලතැන්න සම්පත් මධ්‍යස්ථානයේදී පැවැත්විණ. මෙහිදි දැනට සමාජ මාධ්‍ය මගින් සංචාරක ආකර්ෂණ සංරචක සිදුකරන පළාත් පාලන ආයතන 32ක් වෙනුවෙන් නිලධාරින් පුහුණුවන්නන් ලෙස සහභාගී විය. ප්‍රවීණ සම්පත්දායකයින් වන තන්ගවේල් ශක්තිවේල් මහතා හා චමිලා මුදලිගමගේ මහත්මියගේ සම්පත්දායකත්වයෙන් පැවැත්විණ . මෙම අවස්ථාවට පළාත් පලන දෙපාර්තමේන්තුවේ සහකාර අධ්‍යක්ෂ (සැලසුම්) අරුණි පුෂ්පලතා මහත්මිය සහභාගී විය. ප්‍රාදේශිය වශයෙන් සුවිශේෂි ස්ථාන සමාජ මාධ්‍ය හරහා සංචාරකයන් වෙත ලගාකිරීමේ ක්‍රමෝපායන් පිළිබද දැන්වත් කිරිම සහ ඒ සදහා පළාත් පාලන ආයතන යොමුකිරිම තුලින් පළාත් පාලන ආයතන ශක්තිමත් කිරීම හා ප්‍රාදේශීය වශයෙන් මැදරට ජනතාව ආර්ථික‍ය අතින් ශක්තිමත් කිරිමට ගත් එක් උත්සහයක සාර්ථක ආ‍රම්භයක් ලබාදිමට මෙමගින් පළාත් පාලන දෙපාර්තමේන්තුවට හැකි වී තිබේ.

වර්තමානයේ ලොව පවතින ප්‍රබල බලශක්ති අර්බුදය හමුවේ බලශක්ති කාර්යක්ෂම පරිභෝජනය තුළින් තිරසාරත්වයෙන් යුතු බලශක්ති සුරක්ෂිත අනාගතයක් කරා පිය නැගීම පිණිස රාජ්‍ය ආයතන යොමු කිරීම වෙනුවෙන් රාජ්‍ය පරිපාලන චක්‍රෙල්ඛ අනූව පත් කරන ලද බලශක්ති කළමනාකරුවන් දැනුවත් කිරීමේ වැඩසටහනක් මධ්‍යම පළාත් මාර්ග සංවර්ධන, ප්‍රවාහන, විදුලිබල හා බලශක්ති සහ නිවාස හා ඉදිකිරීම් අමාත්‍යාංශයේ ලේකම්තුමියගේ ප්‍රධානත්වයෙන් හා ශ්‍රී ලංකා සුනිත්‍ය බලශක්ති අධිකාරියේ සම්පත්දායකත්වයෙන් යුතුව ඊයේ දින (11) මධ්‍යම පළාත් සභා ශ්‍රවණාගාරයේදී පැවැත්විණ. මේ සඳහා මධ්‍යම පළාතේ සියළුම පළාත් රාජ්‍ය ආයතන ආවරණය වන පරිදි පළාත් අමාත්‍යාංශ, දෙපාර්තමේන්තු, දිස්ත්‍රික් කාර්යාල සහ රාජ්‍ය ආයතන මෙන්ම මධ්‍යම පළාත් සෞඛ්‍ය අමාත්‍යාංශය යටතේ දිස්ත්‍රික් රෝහල්, ප්‍රාදේශීය රෝහල් හා ආයුර්වේද රෝහල් මෙන්ම සියළුම ප්‍රාදේශීය ලේකම් කාර්යාලවල මාණ්ඩලික ශ්‍රේණියේ බලශක්ති කළමණාකරුවන් 250 ක පිරිසකගේ සහභාගීත්වයෙන් යුතුව මෙම වැඩසටහන පැවැත්විණ. බලශක්තිය සඳහා වැය වන වියදම අවම කිරීමත් බලශක්ති සුරක්ෂිත අනාගතයක් ඇති කිරීමත් වෙනුවෙන් රාජ්‍ය ආයතන වල ක්‍රියාත්මක වන වැඩසටහනේ මූලාරම්භය ලෙස මෙම වැඩසටහන ක්‍රියාත්මක කරන ලද අතර ඒ සඳහා ශ්‍රී ලංකා සුනිත්‍ය බලශක්ති අධිකාරියේ අධ්‍යක්ෂ ( කර්මාන්ත හා සේවා අංශය) සනත් කිත්සිරි මහත්මා සම්පත්දායකත්වය පැවැත්විණ.

මධ්‍යම පළාත් ආණ්ඩුකාරවරයා සහ ජර්මනියේ තනාපති අතර හමුවක්... මධ්‍යම පළාත් ආණ්ඩුකාරවර මහාචාර්ය එස්.බී.එස්. අභයකෝන් මහතා සහ ජර්මනියේ මෙරට තනාපති ලෙස කටයුතු කරන ආචාර්ය ෆීලික්ස් නොඒමන් (Dr. Filix Neumann) මහතා අතර නිල හමුවක් මහනුවර ආණ්ඩුකාර කාර්යාලයේදී (11) සිදු කෙරෙණි. මෙහිදී මධ්‍යම පළාත් ආණ්ඩුකාරවරයා සහ ජර්මනියේ මෙරට තනාපතිවරයා අතර ශ්‍රී ලංකාව හා ජර්මනිය අතර පවතින මිත්‍රත්වය සමාජ, ආර්ථික, අධ්‍යාපනය හා සංස්කෘතිය ආදී කරුණු සම්බන්ධයෙන් සුහද දීර් ඝ කතාබහක නිරත වූ අතර , ලංකාව තුල වුව ද මධ්‍යම පළාතේ පවතින භූගෝලීය හා දේශගුණික තත්ත්වය පිළිබඳව විශේෂ අවධානය යොමු කරමින් අදහස් දැක්වූ තනාපතිවරයා, පළාතේ සංවර්ධන කටයුතු සදහා ජර්මනියේ දායකත්වය ලබාදීමට අවශ්‍ය පියවර ගන්නා බවද තානාපතිවරයා සදහන් කළේය. මෙරට වර් තමානයේ පවතින සාමකාමී පසුබිම පිළිබද සිය සතුට පලකළ තානාපතිවරයා නව පරිවර් තනයන් පිළිබද ඉතා අවධානයෙන් සිටින බවත් , යහපත් වෙනසකට මුලපුරා ඇති බවටත් විශ්වාසය පළකළේය. ජාතීන් වශයෙන් වෙන් නොවී, ශ්‍රී ලාංකීය එකම ජාතියක් වශයෙන් කටයුතු කිරිම යන වත්මන් රජයේ දැක්ම ඔස්සේ කටයුතු කරමින් මධ්‍යම පළාත තුළින් එම ආදර්ශය ලබා දීමට කටයුතු කරන බව මධ්‍යම පළාත් ආණ්ඩුකාරවරයා මෙහිදි සඳහන් කළේය. මෙම සුහද හමුව සංකේතවත් කරමින් මධ්‍යම පළාත් ආණ්ඩුකාරවරයා සමරු තිළිණයක් ද ජර්මන් තානාපතිවරයා වෙත පිළිගැන්විය. මෙම අවස්ථාව සඳහා මධ්‍යම පළාත් ආණ්ඩුකාර ලේකම් මංජුලා මඩහපොළ මහත්මිය ද එක් වූවාය.